قضايا و حوادث وفاة الشابة مها مدوري وهذا آخر ما كتبته من المستشفى متحدية المرض
انتقلت الى جوار ربها الآنسة مها مدوري بعد ان تحدت المرض الذي أصابها. وكانت آخر تدوينة نشرتها واعلنت فيها أنها ستتغلب على المرض الخبيث الذي أصابها كما يلي:
"اليوم نهار جديد اليوم نهار جديد من حياة جديدة اليوم بعدت على عايلتي امي الحنينة بابا الغالي و خواتي ممّو عينيا اليوم بعدت على صحابي عايلتي الثانية العزيزة عليا اليوم نهار جديد اليوم مانيش بش انقّل نعيش وحدي مانيش بش نمشي للخارج بش نقرى اليوم بش نبعد و مانيش بش نبعد بش نبعد ببدني امّا قلبي و عقلي معاهم اليوم نهار جديد بين أربعة حيوط وحدي معزولة في السبيطار.
اليوم تبدى الحرب بيني و بينو امّا انا و إلا هو ستنّا شكونو هو؟ هو غدار خايب ماسط لاسط يدخل في حياتك ما يدقش الباب لا يشاور لا يناور ماشي فيبالو داخل لحمام امّا جا مع العبد الغالط جا معايا جا مع مرا تحب الحياة تحب تعيش تحب تصول و تجول تحب تشق بحور و برور تحب تكتشف بلدان ماكلات عباد حضارات ديانات معتقدات تحب تكون ديما ملمومة مع عايلتها و صحابها تحب الضحكة البنينة و التبسيمة الحنينة تحب اليد الممدودة للخير تفرح الصغير و تفرّج على الكبير اليوم نهار جديد نبدى الحرب مع صاحبي الجديد سرطان الدم ما تتفجعوش!
يطلع يهبط يقعد مرض داء و ليه دواء و نجّم نقاومو بالسياسة بالقوة بش نغلبو و يقعد لكلو كلام اليوم نهار جديد بش يحرمني من شويا حاجات مالعيد مع دارنا من حفلة التخرج من صيف مهبول اما لكلو يهون على صحتي اليوم نهار جديد عرفت حاجة أهم من هكا عرفت محبة الناس ليا و حرصهم عليا عرفت عايلتي قداش تحبني من كبيرهم لصغيرهم عرفت صحابي و أحبابي قداش خايفين عليا اليوم نهار جديد من حياة جديدة مانيش بش نسلم في حياتي بالساهل".
رحمها الله ورزق أهلها وذويها جميل الصبر والسلوان.
